ملف كامل عن البشرة

النمش

النمش ده هو عبارة عن بقع صغيرة داكنة اللون بتظهر في البشرة وهي بتشبه حبات السمسم وبتنتشر في الوجه وخصوصا عند الأنف.. والبقع دي بتحتوي على كمية كبيرة من صبغة الجلد اللي هي الميلانين.

وعلشان أطمن كل القراء اللي مصابين بالنمش لازم تعرفوا إن النمش ده مش مرض لكنه مرتبط ارتباط شديد بالوراثة وعادة بيظهر في أصحاب البشرة الفاتحة والشعر الأشقر.

وظهور النمش مرتبط ارتباط كبير بالشمس والتعرض لأشعة الشمس وعلشان كده بنلاقيه بيصيب المناطق اللي بتتعرض للشمس زي الخدين والأنف والرقبة واليدين.

ولازم كمان نعرف إن لون النمش بيزداد دكانة مع التعرض للشمس لفترات طويلة وعلشان كده دايما الناس بتشتكي من النمش في فصل الصيف.


ماسك الفراولة



واضح طبعا إن الماسك ده هيبقى لذيذ قوي.. فراولة وبيض وماء ورد يعني هتبقى حاجة حلوة متحركة على رجلين.

الطريقة

اعصري 5 حبات فراولة وصفيهم في قطعة قماش ناعمة واضربيهم مع بياض بيضة، وبعدين ضيفي ليهم خمس نقط من ماء الورد وامزجي الحاجات دي كلها مع بعض وافرشيها على هيئة كمادة من القطن، وحطيها على وشك لمدة ساعة وبعدين ارفعيها بعد كده، واغسلي وشك بمية فاترة وتكوني مدوبة فيها 15 جرام يعني حوالي معلقة صغيرة بيكربونات صوديم للتر المية اللي هتغسلي بيه وشك.



ماسك زيت الزيتون



طبعا إنتم عارفين فوايد زيت الزيتون في الأكل للشعر لكن المرة دي هنحطه على البشرة، والماسك ده مخصوص للبشرة الدهنية اللي فيها نمش واستعماله وطريقة تحضيره سهلة جدا.

الطريقة

ادهني وشك بمزيج من زيت الزيتون وزيت حبة البركة بمقدار 4 إلى 1 يعني تحطي 4 معالق صغيرة زيت زيتون ومعلقة زيت حبة البركة، وده هتلاقيه عند أي عطار. والعملية دي تتعمل مرتين مرة الصبح ومرة بالليل ولازم تكرري العملية دي لمدة أسبوع.


ماسك اللوز



الماسك ده مثالي لجميع أنواع البشرات وطبعا فوايد اللوز معروفة للكل من الناحية الجمالية لأنه من مغذيات البشرة والشعر.


الطريقة

قشري 3 حبات لوز وانقعيها في الماء ثم اطحنيها، وضيفي معلقة صغيرة من عصير الليمون وبياض بيضة واحدة لعجينة اللوز وبعدين حطي طبقة من الخليط فوق البقع واشطفي وشك بالمية الفاترة بعد 15 دقيقة. كرري ده كل يوم لغاية ما تزول البقع. قشري ثمرة تفاح، واهرسيها جيداً لصنع عجينة، وحطيها على مكان البقع. وكرري ده يومياً. بالإضافة لده استعملي كريم الصبّار بصفة منتظمة لأنه بيساعد على إخفاء النمش، كما إنه بيفيد البشرة الدهنية بصفة خاصة حيث يخلصها من الدهون الزائدة بها.


ماسك الفجل الحار



طبعا من اسمه ممكن حد يقول: هاحط فجل على وشي، لأ وإيه مش عادي ده حار؟ بس الحقيقة إن العلاج ده جاب نتايج كويسة مع ناس كتير جدا وباتمنى يجيب معاكم نتيجة إنتم كمان.

الطريقة

انقعي معلقة صغيرة من الفجل الحار المبشور (وده هتلاقيه في السوبر ماركت الكبيرة) في عصير ليمونتين لمدة 48 ساعة في حجرة دافئة وعبيه في برطمان أو إزازة وادهني بيه البقع يومياً باستخدام قطعة قطن. وبعد كده حطي طبقة من عصير الليمون الطازج على النمش واتركيه لغاية ما ينشف واغسلي وشك بمية فاترة وكرري الحكاية دي مساء كل يوم حتى يختفي النمش.

امزجي معلقة كبيرة من عصير الفجل مع معلقة صغيرة من مية الزبادي (مش لما بتجيبي زبادي من البقال بتلاقي فيها شوية مية، هي دي المطلوبة) ومعلقة صغيرة من عصير الليمون الطازج وحطي طبقة من الخليط ده على النمش وأول ما تجف اغسلي وشك ونشفيه كويس قوي.


ماسك الفاصوليا



القناع ده بالإضافة إلى إنه بيعالج النمش فهو كمان بينضف البشرة تماما من البثور والرءوس السوداء ويضفي على ملمسه النعومه المتناهية ويزيل المواد الدهنية وأهم حاجة إنه بيساعد على الشفاء من الكلف والنمش. والقناع ده لازم تستخدميه مرتين أسبوعيا علشان تلاقي النتيجة اللي إنت عاوزاها.


الطريقة

اخلطي بياض بيضة واحدة مع ملء معلقتين من العسل الأبيض جيدا وبعدين ضيفي لهم ملء معلقة من عصير الليمون وملء معلقة من مسحوق فاصوليا بيضاء أو مسحوق حمص واطلي وجهك به مع التدليك الخفيف وسيبيه من 1/2 ساعة لساعة كاملة على وشك –حسب ما تستحملي يعني- وبعدين اغسلي وشك بمية فاترة وبعدين بمية ساقعة.
[line]
الرءوس السوداء

الرءوس السوداء دي مزعجة جدا للبنات قمرات 14 لأنها بتخلي شكل البشرة مش ولابد ده غير مشاكلها التانية في أثناء وضع الماكياج.
والرءوس السوداء دي بتتكون نتيجة تجمع المادة الملونة اللي بنسميها الميلانين، وهي عبارة عن صبغة بتفرزها خلايا تحت الجلد في قنوات الغدد الدهنية وبتظهر الرءوس السوداء على هيئة نقطة سوداء في البشرة بتطلع مادة لونها أبيض كريمي.

وإنا كنت عملت عدد مخصوص عن حب الشباب وناقشت فيها المشكلة دي.

ماسك طين البحر الميت



الماسك ده منظف رائع للبشرة ولا يستخدم إلا في الأسبوع مرة واحدة فقط ولا يزيد أبدا عن مرتين. وهو مناسب جدا للبشرة الدهنية ولعلاج حب الشباب.

الماسك ده بيعمل تنظيف عميق للبشرة علشان هو بيساعد على تخليص المسام من الدهون والشوائب المترسبة فيها وكمان بيساعد على التخلص من الرءوس السوداء وحبوب الوجه بصفة عامة..

وبيستخدم الماسك بمعدل مرة واحدة أسبوعيا وبحد أقصى مرتين أسبوعيا؛ لأنه بيعرض البشرة للجفاف.

الطريقة

هاتي 4 معالق كبيرة زبادي و 2 معلقة صغيرة طين البحر الميت، و2 معالق صغيرة ماء بطاطس ثم اخلطي جميع المكونات جيدا لعمل عجينة لينة، وتوضع على الوجه مع تجنب المناطق الرقيقة حول العينين ومع الاسترخاء لمدة 15 - 20 دقيقة وبعدين اغسلي وشك بالمية الفاترة.


ماسك الشوفان



كمان فيه ماسك الشوفان والشوفان ده نبات يشبه القمح شوية وموجود في محلات العطارة الكبيرة وكمان في السوبر ماركت.

والماسك ده بينضف البشرة وبيفتح لونها بس لازم تداومي عليه تلات مرات في الأسبوع وهتلاحظي الفرق.


المقادير

1 معلقة لبنة.
1 معلقة شوفان مطحون.
1/4 معلقة ماء ورد.
1/3 معلقة خميرة وتدوبيها في ماء الورد والليمون.
1/4 معلقة عصير ليمون.

الطريقة

اخلطي المقادير دي كويس جدا وحطيها على الوجه كله ما عدا حول العين.

[line]
المسام الواسعة

البشرة اللي بتعاني من المسام الواسعة بتتعب صاحباتها لأن المسام الواسعة لوحدها مشكلة؛ ده غير إنه بينتج عنها مشكلة تانية هي الرءوس السوداء لأن كون مسام البشرة واسعة فمعنى كده إنها بتخزن كمية كبيرة من الدهون غير المفيدة للبشرة

ماسك النشا



بيستخدم النشا لعلاج حبوب الوجه والمسام الواسعه وحروق الشمس بالإضافة لأنه منظف ممتاز للبشرة.

المقادير

ملعقة كبيرة نشا.
ربع فنجان قهوة مية دافية.
ربع فنجان قهوة زيت الزيتون.

الطريقة

ادهني البشرة الأول بزيت الزيتون وبعدين اخلطي النشا بالمية وحطيهم على البشرة لمدة 20 دقيقة واغسلي وشك بالمية الدافية.